Suliffeqalernissamut piareersimanissaq pillugu Namminersornerullutik Oqartussat nalunaarutaat nr. 42, 14. december 2001-imeersoq.
Annertussusileriikkanik ikiorsiissutit pillugit Inatsisartut peqqussutaanni nr. 15, 12. november 2001-imeersumi § 4, imm. 5 malillugu aalajangersarneqarput:
§ 1. Suliffissaarunnermi annertussusileriikkanik ikiorsiissutinik Inatsisartut peqqussutaanni § 4, imm. 3 naapertorlugu tunineqarnissamut patsisissaatitaapput,
1) pineqartup peqqissutsikkut allatigulluunniit atugarisaminut naleqquttumik suliffissamik innersuunneqarsinnaanani uppernarsarsinnaassagaa, aamma
2) suliffissaarunneq nammineerluni pisuussutaanngitsoq imaluunniit feeriarnermik, suliumajunnaarnermik imaluunniit sulisitsisup mattussineranik pissuteqanngitsoq.§ 2. Suliffissaaleqisoq najukkamini suliffissarsiuussisarfimmut suliffissaaleqisutut nalunaassaaq suliffissatullu innersuunneqartup tigunissaanut piumassuseqassalluni.
§ 3. Suliffissamik innersuussinermi suliffissaaleqisup peqqissusianut, ilinniagaqarsimaneranut inuttullu atugarisaanut tunngasut mianerineqassapput. Innersuussineq pisinnaavoq namminersortut imaluunniit pisortat suliffiutaanni nalinginnaasumik suliassamut imaluunniit kommunit suliffissaqartitsiniutaanni peqataanissatut.
Imm. 2. Suliffissaaleqisup suliassatut innersuussaq maannamut suliaqarfigisami avataaniinnera pissutaatillugu tigujumanngissinnaanngilaa.§ 4. Suliffissaaleqisup annertussusileriikkanik ikiorsiissutinik pissarsisinnaatitaanini annaanagu suliffissatut innersuussaq tigujumanngissinnaavaa patsisissaatitaasut makkua ilaat ataaseq arlallilluunniit eqquutsinneqarsimappata:
1) Pineqartup peqqissusiata suliffissatut innersuussap tigunissaa ajornartippaa. Tamanna kommunip peqqinnissaqarfimmut uppernarsaqqusinnaavaa. Tassunga aningaasartuutaasinnaasut kommunimit akilerneqassapput.
2) Suliffissatut innersuussap suliffiginissaanut pineqartup iliniagaqarnikkut piginnaasai amigarput.
3) Pineqartup suliffissatut innersuuussaq angallannikkut naleqqutinngitsunik aningaasartuuteqaqqaarluni aatsaat tigusinnaavaa.
4) Suliffissatut innersuussami suliartortarfissat pissutigalugit meeqqaminut paarsisoqarnissaminut pineqartoq periarfissaqanngilaq.§ 5. Suliffissatut innersuussamik pissutissaqarani tigusiumanngittoqarpat suliffissaaleqisup suliffissamik itigartitsinerata ulluaniit annertussusileriikkanik ikiorsiissutinik pissarsisinnaatitaaneq atortunnaassaq. Annertuussusileriikkanik ikiorsiissutinik pissarsisinnaatitaaqqittoqalissaaq pineqartoq sap. akunnerini 13-ini suliffeqaqqereerpat pissutissaatitaasullu eqquutsinneqarsimappata.
§ 6. Suliffissaaleqisoq suliffimminit nammineerluni soraarsimappat annertussusileriikkanik ikiorsiissutit tunniunneqannginneranni pineqartup uppernarsassavaa soraarnerminut pissutaasoq atorfeqartitaanermini pissutsinik sulisitsisup suminginnaasimanera. Uppernarsaat tassaasinnaavoq isumaqatigiissitsiniarnermit aalajangiineq taamaaqataaluunniit. Taamatut pisoqarpat annertussusileriikkanik ikiorsiissutit kingumoortumik tunniunneqassapput pissutissaatitaasut allat suliffissaaleqisup eqquutsissimappagit.
§ 7. Nalunaarut manna ulloq 1. januar 2002 atortuulerpoq.
Namminersornerullutik Oqartussat, ulloq 14. december 2001
Ole Dorph/
Martha Abelsen